Прэзідэнт ЗША Дональд Трамп у сацсетцы Truth Social заявіў, што згодны на двухтыднёвае перамір'е з Іранам. Паводле яго, за гэты час бакі могуць завяршыць падрыхтоўку пагаднення, якое мае замацаваць спыненне агню і наблізіць доўгатэрміновае ўрэгуляванне.
Трамп паведаміў, што прыняў такое рашэнне па выніках перамоваў з прэм’ер-міністрам Пакістана Шахбазам Шарыфам і фельдмаршалам Асімам Мунірам.
Са словаў амерыканскага лідара, пакістанскі бок папрасіў яго адмовіцца ад «разбуральнай сілы», якая, як ён сцвярджае, мусіла быць скіраваная супраць Ірана ўжо гэтай ноччу. У адказ Трамп згодны прыпыніць удары па Іране на два тыдні пры ўмове, што Тэгеран забяспечыць «поўнае, неадкладнае і бяспечнае адкрыццё Армузскага праліва».
Палітык растлумачыў, што гаворка ідзе пра «двухбаковае спыненне агню». Ён дадаў, што ЗША ўжо выканалі ўсе ключавыя ваенныя задачы і цяпер гатовыя перайсці да фінальнай стадыі перамоваў.
«Мы атрымалі ад Ірана прапанову з дзесяці пунктаў і лічым, што яна можа стаць рабочай асновай для перамоваў. Практычна па ўсіх пытаннях, якія ў мінулым выклікалі рознагалоссі паміж ЗША і Іранам, ужо ўдалося дасягнуць згоды, аднак двухтыднёвы перыяд дазволіць завяршыць і канчаткова аформіць пагадненне», — расказаў Трамп.
Ізраіль таксама пагадзіўся на часовае спыненне агню, паведаміў CNN прадстаўнік Белага дома.
Раней Пакістан папрасіў Дональда Трампа даць Ірану два тыдні на перамір'е і падоўжыць тэрмін ультыматуму, каб працягнуць перамовы. Узамен Ісламабад прапанаваў Тэгерану на той жа тэрмін адкрыць Армузскі праліў. Паводле інфармацыі Reuters, Іран успрыняў ініцыятыву станоўча.
Нагадаем, да гэтага, каментуючы сітуацыю вакол Ірана, Дональд Трамп напісаў у сацсетцы, што «цэлая цывілізацыя загіне ўжо сёння ўначы і ніколі не будзе адноўленая». Ён дадаў, што не хацеў бы такога выніку, але лічыць яго імаверным.
Раней ён вызначыў дэдлайн для Ірана, запатрабаваўшы адкрыць Армузскі праліў для суднаходства: тэрмін заканчваўся ў аўторак, 7 красавіка, у 20.00 паводле ўсходнеамерыканскага часу (3 гадзіны ночы 8 красавіка паводле беларускага). У адваротным выпадку палітык пагражаў Ірану знішчэннем інфраструктуры.
Чытайце таксама
